SAÇ KƏPƏYİ

👉 Buradan dinləyin

Başın tüklü hissəsində xırda pulcuqların, kəpəyin əmələ gəlməsi, seboreyanın, xroniki xəstəliklərin, xüsusilə, mədə-bağırsaq sisteminin xəstəliklərinin, sinir-psixiki pozğunluqların, qida zəifliyinin, yorğunluğun nəticəsi ola bilər. Bu zaman başın ənsə-təpə nahiyəsində və yaxud bütövlükdə tüklü hissəsində düzgün sərhədləri olmayan qabıqvermə sahələri əmələ gəlir. Sadə kəpək quru, boz-ağımtıl pulcuqlar şəklində olur və asanca qoparaq saçların arasında yığılır, başın dərisi öz parıltılığını itirir. Nadir hallarda kəpək qat-qat olur, sarımtıl rəngə çalır, bir-birinə yapışmış vəziyyətdə olur və dəridən çətin qopur (piyli və ya steatoidli kəpək).

Müalicə məqsədi ilə kükürdlü, civəli və salisilli məlhəmlərdən, sulsen sabunu və ya pastasından istifadə olunur. Daxilə A və B-qrupu vitaminlərinin qəbulu məqsədəuyğundur.

Kəpək və saçın tökülməsinə qarşı tarixin təcrübəsindən keçmiş xalq vasitəsi:

• 20 q bataqlıq zambağı (air) kökü, 10 q kalendula çiçəyi, 20 q pıtraq kökü (lopux), 15 q mayaotu qozasını 1 litr qaynar suda dəmləyərək 2 saat gözləmək, süzmək və alınmış dəmlə başın tüklü hissəsini islatmaq lazımdır.

Daha bir resept:

• 1/4 xörək qaşığı konyakla (və ya romla) 1 yumurtanı yaxşıca qarışdırıb, qabaqcadan yuyulmuş nəm saçlara sürtür və dəsmalla bağlayırsınız. 25 dəqiqədən sonra saçları ilıq su ilə yaxalayırsınız.